So hamma gspuit - unter diesem Motto lest Ihr hier nach jedem Bundesliga-Spieltag einen bairischen Spielbericht. Hamma wieda gwunna, wia se des ghert? Oda hamma valuan, wos beim Fuaßboi hoit a moi bassiern ko? Heit vazai ma Eich, wos am sechsazwanzigstn Spuidog gscheng is, beim Fünfnui dahoam gega Bremen.
Scho vorm Spui gega Werder hamma a recht a guads Gfui ghabt: „I moan oiwei, des wer ma gwinna.“ Und genauso is dann a kemma: Da Oba sticht an Unta, fünf Heisl gega Bremer, de wos recht oid ausgschaugt ham. So gengan de Gang - und unsa Freind, da Pizarro Claudio, und seine neia Spezln miassn ihre Punkte woanderst hoin. Mia hoitn d’Damma!
Sakrisch schod war’s, dass da Pizza ned fia seine Fischkepf hot spuin kenna. Er hot se zwoa Dog vorm Spui weh doah, und jetz hoff ma, dass a im April im Pokal in Minga am Blotz drom steh ko. Bei uns war da Götze Mario wieda dabei, und hot pfenningguad gspuit, wennst da überlegst, dass a vier Monat lang ned gscheid hatschn hot kenna. Da Pep hot glei fünf Leit vom Dortmund-Spui draußd lassn. Einekemma san außerm Mario no da Benatia Mehdi, da Coman Kingsley, da Thiago und da Ribéry Franck, bei dem wo’s imma wieda a Freid is, wenn ma’n segn derfa.
As Spui? Mei, wos soi ma sogn? Es war scho moi spannender bei uns in Fröttmaning draußd. As Oansnui vom Thiago in da neintn Minutn, am Müller Thomas sei Zwoanui nach ana hoibn Stund - und scho war a Ruah mit Bremen. Aus, Äpfe, Amen. In da zwoatn Haiftn hammas a bissl gmiatlicha ogeh lassn, wei ja am Mittwoch scho wieda d’Italiener vo Juve wartn.
Aba fia drei Heisl vom Müller, vom Lewy und vom Thiago hot’s leicht no glangt. Drei Sachan, die aufgfoin san, wia’s im Internet hoaßn dad: Da Coman Kingsley hot narrisch guad gspuit - den Bua kannt ma pfeigrod kaffa, des war’ oana fia uns. Da Thiago war aufdraht wia lang scho nimma, des hot uns daugt. Und beim Mario host hoit glei gseng, wos da Bua ko: Vui am Boi, fast a Heisl gschossn. So derf’s weida geh mit eahm!
Stimma zum Spui
Pep Guardiola: „Des ko se segn lassn. Mia san sauba gstandn, mia ham de Bremer koa Luft zum Schnaufa lassn, und vo Mainz red jetz neamads mehr. Des ham d’Buam guad gmacht. Jetz hamma vier Dog, bis Juve kimmt. I hoff, dass d’Fans am Mittwoch neinzg Minutn lang plärrn wia d’Jochgeier, wei des wer ma braucha kenna.“
Karl-Heinz Rummenigge: „Bis zum Zwoanui hamma uns ned ganz so leicht doa. Aba dann is schee dahi ganga, und grod da Coman hot’s rechts draußn sakrisch kracha lassn. Am End vom Dog hamma a no wos fias Torverhältnis doa, wos wuistn mehra?“
Kingsley Coman: „A la bonör vo uns, dad i sogn.“
Themen dieses Artikels