Abfent, Abfent, as vierte Kerzerl brennt!

Text vorlesen
icon
Schrift vergrößern
icon

So hamma gspuit! Unter diesem Motto lest Ihr hier nach jedem Bundesliga-Spieltag einen bairischen Spielbericht. Hamma wieder gwunna, wia se des ghert? Oder hamma valorn, was beim Fuaßboi hoit a moi bassiern ko? Heit vazai ma Eich, was am sibbzenntn Spuidog gscheng is, beim Viernui dahoam gega Wolfsburg.

Vorm Spui: Oana geht no, oana geht oiwei! Im letztn Spui vom ganzn Johr hat am Freidog auf d'Nacht in da vui z'staadn Allianz Arena draußd in Fröttmaning Wolfsburg auf uns gwart. D'Buam vom Kohfeldt Flori warn zletzt gscheid haudig beinand. Aber des kast an VfL scho a o, und deswegn hamma erscht recht Obacht gebn miaßn, dass de uns unsern Dreier ned abluxn. Da Niki und da King ham ned guad hatschn kenna, fia es san da Upa und da Leroy einekemma. Und dann is a scho aufganga beim Schichtl.

D'erste Hoibzeit: In da erstn Minutn hat se da Müller Thomas as erste Moi gfrein derfa, wei a as vierhundertste Moi in da Liga fia uns gspuit hat. Und in da siebtn Minutn hat se da Raumdeita glei weida gfreit, wei da Casteels Koen im Heisl vo Wolfsburg an Boi vom Serge bloß abproin lassn hat kenna - aber da Thomas steht grad recht, staubt ab und macht as Oansnui. Späda ham d'Greana dann aber zoagt, dass se se ned so leicht aufmischn lassn. Mia war'n eftas z'dasig, und da Casteels hat ja Händ, Mariandjosef, de san groß wia Abbortdeggl. Und so is beim Oansnui bliem, bis d'erste Haiftn gar war.

D'zwoate Hoibzeit: Mia woitn Wolfsburg scho no as oane oder anderne Heisl aufschmoizn, und des hat dann a highaut. In da Simmafuchzigstn kepfet da Upa as Zwoanui . Grad amoi drei Minutn späda spuin da Serge und da Leroy pfennigguad zamm - und da Leroy schlenzt an Boi vo rechts zum Dreinui ins linke Eck. Wia da Arjen hat as gmacht! Jetz is bloß no a Heisl vom Lewy ois i-Düpferl abganga. Und wei glei scho Weihnachtn is, hat der Wunsch a no highaut. In da Simmadachzigstn legt da Musi mitm Deez schee fian Lewy auf, da Lewy draht se und schiaßt as Viernui. Des war dann sei dreiavierzigstas Bundesliga-Heisl Zwoadausndoanazwanzge. Des hat in am oanzign Johr no ned amoi unser Gerd hibracht - der wos gwiß vo obn mit ana scheenan Schüssl Erdäpfesalad zuagschaugt und se gfreit hat.

Nachm Spui: Abfent, Abfent, as vierte Kerzerl brennt! Ma muaß bloß dawartn kenna, am Schluss hamma Wolfsburg do no gscheid hoamgleicht. Des hat se a da Nagelsmann Julian gfoin lassn: „Des i genau mei Weda. Was mia olle mitanand in dem erstn hoibatn Johr zammbracht ham, daugt ma narrisch. Und vier Heisl gega so an Gegner, der wos uns hint as Lebn so schwar macht, muaßt erst amoi schiaßn." Jetz rast ma uns aus, schnabuliern unser Weihnachtsganserl, und danoch pack ma wieder krawottisch o. Feiert's olle mitanand schee, und bleibt's uns xund!


Themen dieses Artikels

Diesen Artikel teilen