So hamma gspuit! Unter diesem Motto lest Ihr hier nach jedem Bundesliga-Spieltag einen bairischen Spielbericht. Hamma wieder gwunna, wia se des ghert? Oder hamma valorn, was beim Fuaßboi hoit a moi bassiern ko? Heit vazai ma Eich, was am oanazwanzigstn Spuidog gscheng is, beim Dreizwoa dahoam gega Leipzig.
Vorm Spui: Samsdog auf’d Nacht, wenn as Liacht odrahd is bei uns dahoam in da Arena - da spui ma am liaban. Und wenn dann a no zehndausnd vo unsre Leit zruck ins Stadion derfan, dann is glei nomoi so schee. Mia hoffan, dass’ boid no vui mehra wern. Mia ham jetz zwoa Wochan Zeit zum Trainiern ghabt, und da Julian zwoa Wochan Zeit zum Diftln. Er is aber beim Dreizwoavieroans bliem, mit dem wos a zletzt spuin hat lassn. Des hoaßt auf guat Boarisch: Fünf offensive Leit gega Rasnboi, so gfoit uns des. Boin hamma gwiß ned ghabt gega d’Sachsn. Aber dass de ned ohne san, hamma scho a gwusst.
D’erste Hoibzeit: Dass des unser wampada Ernst is, dass gega RB unser nächster Dreier her muaß, hamma vo Anfang o zoagt. Es hat a bloß zwaif Minutn dauert, bis’ Oansnui fia uns gstandn is. Da Coco krampfet se an Boi vo Leipzig und spuit zum Lewy. Da Lewy schiaßt, da Gulasci Bäda hoit no - aber dann staubt da Thomas müllermassig ab. Glei drauf hat Rasnboi aber schbitzkriagt, dass heit bei uns was geh kannt. De ham se an Schneid ned obkaffa lassn, und as Oansoans vom Silva Anderl in da Achtazwanzigstn hamse se gwiß vadient. Des gift uns gscheid! Aber mia waratn ned mia, wenn uns da drauf koa Antwort ned eifoin dad: In da Vieravierzigstn schiaßt da Lewy as Zwoaoans. Aber mia miaßn weida Bauchwäh ham, Rasnboi gibt no lang ned kloa bei.
D’zwoate Hoibzeit: Mia san Zwoaoans voraus, aber mia hudln vui z’oft. Und so brauch ma uns übers Zwoazwoa vom Nkunku Chrissi in da Dreiafuchzigstn ned wundern. D’Kuah bleibt am Eis drom, des Guatl is no lang ned glutscht, und es schebbat in oana Tour. In da Achtafuchzigstn legt se da Gvardiol Joško an Boi vom Serge saiwa ins Nest, und mia san Dreizwoa voraus. Mia miaßn dann bis zum End no gscheid ziddan, Rasnboi schiaßt no as oane oder anderne Billetl. Aber mia bringan unsern Dreier hoam, und ois in oim hamma’s guat deixlt.
Nachm Spui: Ja spinnt da Beppi, des war ja a voglwuids Spui! Am Schluss war ma ganz daloawed. Aber da Nagelsmann Julian hat se krawottisch gfreit, dass ois guad ganga is: „Mei liaba Schiaba, da hat se fei was griart am Platz drobn. Es hätt gwiß a Unentschiedn ausgeh kenna. Aber wennst ois zammad nimmst, hamma uns den Dreier scho vadient. Nächsts Moi miaß ma hint besser Obacht gebn, aber heit daugt’s ma erstmoi.“