11_VfLFCB_220212_DON

Hifoin is koa Schand…

Text vorlesen
icon
Schrift vergrößern
icon

So hamma gspuit! Unter diesem Motto lest Ihr hier nach jedem Bundesliga-Spieltag einen bairischen Spielbericht. Hamma wieder gwunna, wia se des ghert? Oder hamma valorn, was beim Fuaßboi hoit a moi bassiern ko? Heit vazai ma Eich, was am zwoarazwanzigstn Spuidog gscheng is, beim Zwoavier drom in Bochum.

Vorm Spui: Bochum! Da Grönemoare! Diaf im Westn! Seit Zwoadausndneine hamma nimma mehr bei unserne Spezln vom VfL spuin derfa. Jetz war ma wieder zruck, nach ewig und drei Dog. Zeit is worn! Aber so arg gern, dass ma eahna den Dreier schenga dadadn, hamma Bochum a wieder ned. Gwinna woit ma auf jedn Foi - a ohne an Manu, der wos uns wega seim Gschiß mitm Meniskus zerst amoi fait. Aber aufn Ulle kemma uns eh valassn. Und dann is a scho dahiganga.

D'erste Hoibzeit: De Buam vom Reis Thommy ham se vo Anfang o was traut, es hat eahna bloß nix ghoifa. Wei in da neintn Minutn bringt da Lewy an Boi quasi mit zwoa Fiaß am Esser Miche im Heisl vo Bochum vorbei, und mia san Oansnui voraus. Aber wer se dacht hätt, so genga de Gang, des Guatl is glutscht, der hat se sauber gschnien. Wei vo da vierzenntn bis zua vieravierzigstn Minutn dabräslt's uns gscheid. Mia wissn ibahapts ned, wia uns gschicht - und Bochum macht vier Heisl, oans scheena wia's anderne. Da Antwi-Adjei Chrissä, da Locadia Jürgen, da Gamboa Crissi und da Holtmann Gerrit machan stangalgrad as Oansoans , as Zwoaoans , as Dreioans und as Vieroans, und mia kennan bloß mit de Ohrwaschln schlackern. Was war jetz nachad des? Mia san doch da ned beim Hopfazupfa!

15_VfLFCB_220212_IMA

D'zwoate Hoibzeit: Des mechst ja ned fia meglich hoitn. Mia san drei Heisl hintnache, da Julian prowiert ois, er bringt an Coco fian Upa. Und neamads woaß, ob des Guatl scho glutscht is. Mia kniagln uns eine, da konn ma nix sogn. Aber mehra ois wia as Vierzwoa vom Lewy in da Fimfasibbzigstn war nimmer drin. Bochum hat uns sauba hoamgleicht, mia ziagn an Huat. Und des kemma uns a ned schee dringa. Aber mia wissn olle: Hifoin is koa Schand - aufs Aufsteh kimmt's o! Und da wer ma uns ned lumpn lassn.

Nachm Spui: Diaf im Westn - so hamma uns des Bochum-Liadl vom Grönemoare gwiß ned vorgstait. Aber mia gwinnan mitanand, und mia valiern mitanand. Und gega Soizburg am Mittwoch wer ma uns mehra ois wia bloß oan Hax ausreißn, des woaß a da Nagelsmann Julian: „Sauba gmacht vo Bochum, da komma nix sagn. Hagottsa, war des a misarabligs Spui fia uns, des derf uns ned bassiern. Wenn ma in da zwoatn Hoibzeit schnai as zwoate Heisl machan, gäht vielleicht no was, aber des hat a ned highaut. Den Dreier hat se da VfL gwiß vadient."


Themen dieses Artikels

Diesen Artikel teilen