16_M05FCB_300422_DON

Koane großn Sprüng gmacht

Text vorlesen
icon
Schrift vergrößern
icon

So hamma gspuit! Unter diesem Motto lest Ihr hier nach jedem Bundesliga-Spieltag einen bairischen Spielbericht. Hamma wieder gwunna, wia se des ghert? Oder hamma valorn, was beim Fuaßboi hoit a moi bassiern ko? Heit vazai ma Eich, was am zwoaradreißigstn Spuidog gscheng is, beim Oansdrei in Mainz.

Vorm Spui: Moasta samma scho, seit unserm bärigen Dreioans letztn Samsdog dahoam gegan BVB. Aber d'Liga geht no drei Spiele lang, und da woi ma gwiß ned auslassn. Mia ham in Mainz aufn nächstn Dreier gspecht'. Aber mia ham a gwusst, dass d'Nuifünfa gwiß koa Mogntratzerl san. Gega de hamma uns scho efters hart doa.

D'erste Hoibzeit: D'Buam vom Svensson Bo san vo Anfang o am Gas drobn gstandn, dass'd nur so mit de Ohrwaschl schlackern kannst. Und mia warn a weng dasig, wenn ma uns ehrlich san. Und deswegn hat's in da erstn Hoibzeit glei zwoamoi gschebbat bei uns, mitm Oansnui vom Burkardt Jonny in da Achzenntn und mitm Zwoanui vom Niakhaté Moussa in da Simmazwanzigstn. Mainz hat pfenningguad gspuit, des muaß ma eahna lassn. In da Dreiadreißigstn legt da Choupo dann schee auf fian Lewy, da Lewy schiaßt as Zwoaoans, und mia san wieder zruck im Spui. Biagn ma des no um? Es warat ned as erste Moi gega Mainz!

15_M05FCB_300422_DON

D'zwoate Hoibzeit: Mia druckan, mia spuin besser. Aber an dem Dog samma Mainz ums Varecka ned Herr worn. In da Simmafuchzigstn schiaßt da Barreiro Leandro auf unser Heisl, da Benji faischt no ab, und da Boi hupft uns Wembley-massig vo da Lattn zum Dreioans ins Kistl. Des hat da Deife gsegn! Da war da Kas dann ananpfirsich bissn, mia ham in Mainz koane großn Sprüng gmacht. Jetz miaß ma schaugn, dass ma de Schartn in de letztn zwoa Spiele gegan VfB und drom in Wolfsburg auswetzn.

Nachm Spui: In Mainz hamma uns an Schiafa eizogn, des fuxt uns gscheid. Des findt a da Nagelsmann Julian, der wos gmoant hat: „Den Dreier hamse d'Mainzer vadient. Mia warn ned handdig gnua, des war ois a weng zweng. A wenn ma grad Moasta worn san, hamma oiwei no as Bayern-Wapperl vorn drom am Leiberl."


Themen dieses Artikels

Diesen Artikel teilen

Weitere news